चोरट्याची छबी सीसीटीव्ही कॅमेऱ्यात कैद

अपार्टमेंटमधील पार्किंगमधून मोटारसायकल लंपास

भुरट्या चोरीच्या घटनांत वाढ

नवरात्रौत्सवामुळे शहर, उपनगर आणि ग्रामीण भागात दांडिया कार्यक्रम सुरू असतानाच दुसरीकडे भुरट्या चोरट्यांनी डोके वर काढण्यास सुरुवात केली आहे. काळी आमराई येथील एका अपार्टमेंटच्या पार्किंगमधून मोटारसायकलची चोरी झाली आहे. चोरट्याची छबी सीसीटीव्ही कॅमेऱ्यात कैद झाली असून पोलिसांनी चोरट्यांचा बंदोबस्त करावा, अशी मागणी केली जात आहे. काळी आमराई येथील एका अपार्टमेंट मध्ये रात्री चोर शिरल्याचे दिसून येत आहे. प्रथम त्याने त्या ठिकाणच्या मोटारसायकलींची टेहळणी केली. त्यानंतर पार्किंगमधील लाईट बंद करून मोटारसायकलचा हँडल लॉक तोडून मोटारसायकल लांबविली. सदर चोरटा सीसीटीव्ही कॅमेऱ्यात कैद झाला असून, सदर मोटारसायकल अविनाश बांदेकर यांच्या मालकीची असल्याचे समजते. भुरट्या चोरीच्या घटनांत वाढ झाली असल्याने पोलिसांनी चोरट्यांचा बंदोबस्त करावा, अशी मागणी केली जात आहे.