कपिलेश्वर तलावाजवळ विसर्जनासाठी मनपाचे १०० कर्मचारी अधिकारी तैनात

शनिवार दि. 6 रोजी अनंत चतुर्दशीदिवशी शहर व उपनगरातील सार्वजनिक गणेशोत्सव मंडळांकडून विविध तलावांमध्ये गणेश मूर्तींचे विसर्जन केले जाणार आहे. या पार्श्वभूमीवर महापालिकेने कपिलेश्वर जुना व नव्या तलावावर अधिक लक्ष केंद्रित केले आहे. या दोन्ही ठिकाणी त्या दिवशी सकाळच्या सत्रात 60 अधिकारी व कर्मचारी तैनात केले जाणार आहेत. तर रात्रीच्यावेळी 40 अधिकारी व कर्मचारी तैनात असणार आहेत. याबाबतचा आदेश मनपा आयुक्त शुभा बी. यांनी जारी केला आहे.

प्रत्येक वर्षी बेळगावातील सार्वजनिक गणेशोत्सव मंडळांची संख्या वाढत चालली आहे. गेल्या महिन्याभरापासून जिल्हा प्रशासनाकडून गणेशोत्सव आणि विसर्जना्या पार्श्वभूमीवर विविध प्रकारच्या उपाययोजना संदर्भात तयारी सुरू आहे. पोलीस खाते, महानगरपालिका, हेस्कॉम, वनखाते, प्रदूषण नियंत्रण महामंडळ यासह विविध खात्यांचे अधिकारी सातत्याने एकमेकांच्या संपर्कात आहेत. विविध सार्वजनिक मंडळांना भेटीगाठी देऊन माहिती घेण्यासह विसर्जन मार्गाचीदेखील पाहणी केली जात आहे.

शहरात ३८० हून अधिक सार्वजनिक गणेशोत्सव मंडळे आहेत. यापैकी सर्वाधिक मंडळांकडून गणेशमूर्ती विसर्जनासाठी जुन्या आणि नव्या कपिलेश्वर तलावाकडे आणल्या जातात. त्याचबरोबर जक्कीन होंड, अनगोळ येथील लाल तलाव, कलमेश्वर तलाव जुने बेळगाव, ब्रह्मदेव मंदिर मजगाव, किल्ला तलाव, कणबर्गी व नाझर कॅम्प वडगाव या ठिकाणीही गणेश मूर्तीचे विसर्जन केले जाते. त्यामुळे या तलावांच्याठिकाणी महापालिकेकडून यापूर्वीच आवश्यक ती सर्व तयारी पूर्ण करण्यात आली आहे.